- 698 -

1445. Juni 20. Breslau.

Die Rathmannen bekennen, dass die Magister Johann und Mathis Kochenschreiber, um die Stadt von dem Wucherschaden zu befreien, der seit 13 Jahren, da sie gegen die Angriffe der Hussiten von den Juden 1000 ungar. Gulden aufgenommen hatte, nach Rückzahlung von 700 Gulden, auf ihr lastete, ihr die restirenden 300 Gulden vorgestreckt haben, wofür sie ihnen im Namen der Gemeinde ihr Erbgeschoss auf 3 städtischen Vorwerken wiederkäuflich abtreten.

Wir rathmanne der stad Legnicz bekennen offintlich in desem brieffe allen den, dy en sehn, horen adir lesen, als denne vnsere vorfarn rathmanne czu czeiten vnd nemelich in deme jare als man geschrebin hot noch der geburt Cristi vnsers herren firczenhundirt im czweyvnddreisigisten jare von gebote vnd befelunge, dy czeit vnsers gnedigen hirren eczwenne herczogen Ludwigis selligin vnd mit gemeynem rate erer eldisten gesworen vnd der ganczen gemeynen der stad Legnicz vnd nemlich czu enthaldunge derselbin wedir dy vnglowbigen vnd vorstockten ketczer czu Behem, dy denne dy czeit mit mechtigin herczogin dese land wy offte obirczogin vnd vorherten vnd svste merglicher stete in Slezien mit grawsaman stormen inkregin vnd obirfilen mit brande vnd slachtunge gruntlich czustorten vnd vorterbeten, czu jwdisscher hand, deme sy denne dasmalis nicht anders thuen mochten awsgenomen hatten tawssundt guter Vngarisscher gulden, do mete sy vnd mit andirm gelde, das sy von der stad wegin doczu legetin mergliche sewldener czu rosse vnd czu fusse, wy uffte vnd lange gehalden vnd mergliche bawe vnd festenuge an der stad wedir soliche gewalt vnd der czu wedirsteen dem almechtigen gote czu lobe vnd czu dinste, czu sterkunge des heiligen cristlichen glawbens geton vnd domete dese stad vnd alle ire inwoner beide arm vnd reich enthalden haben, soliche summa geldis durch so vil jar von eren nochkomen vnsern vorfarn einis teils beczalt vnd vorgulden ist wurdin, nemlich des jaris als man geschrebin hot noch der gebort Cristi vnsers herren firczenhundirt im achtvnddreisigisten virhundirt gulden vnd abir donoch des jaris, als man geschrebin hat noch Cristi vnsers herren geburt vierczenhundirt im drey vnd virczigisten dreihundirt gulden wurdin beczalit, alzo das dar noch bis uff vns dreyhundirt gulden vnvorgulden sint bleben ansteen czu judisscher hand, do von wir denne so foste also vnsere vorfarn den juden jerlichin wuchir schadin vnd gesuch haben müssen thuen vnd gebin vnd dy jerlichin vornewen vnd vorbriffen, soliche schaden czuvormeiden vnd czu vmbegeen sottawe ebintewere, dy denne czu czeiten aws solichim judisschin schreibunge offtoen vnd soliche sache in bessere wege czubrengin, so haben wir mit gemeynem rate von den vnsern, nemlichen den ersamen magistro Johan vnd Matis Kochinschreibern gebrudern soliche summa dreihundirt guter Vngarisscher gulde mit bete awsbrucht vnd entpfangin, dy vns dy czu solichen obengeschrebenen mergliche notcze vnd der stad bestis czu grosser fruntschafft vorgereicht haben, domete wir von deme jwden komen sint vnd dy solichir summen des jaris entlich beczalit habin vnd vor sottane summa nemlich dreyhundirt Vngarissche gulden so haben wir en von solichem gemeyne rate wost vnd willen recht vnd redelich vorkoufft vnd uff gelossen vnser stad erbgeschassere, dy wir jerlichin habin off den dreien forwerken vnd gutern vnd alle ire czugehorunge, nemlich uff Nickeln Schulczen czehn marg, Jost Schulczen acht marg vnd Anthonius Winkeler sebin marg, daz do macht in eyner summen vumffvndczwenczig marg in den hundirt huffen im Dorpusche vndir vns vnd vnsir stad gelegin czu eynem rechten wedirkouffe vmbe dreyhundert guter Vngarissche guldin, wenne wir des mit vnsern nochkomen czu rote werden. Der selbin vunffvndczwenczig marg sal vnd wil magister Johan egenanter dy helffte nemlich dreiczendehalbe marg haben vnd hebin, dyweile her lebit in follir macht do mete czu tuen vnd czu lossen vnd noch semen tode seyne erbin vnd eliche nochkomen vnd vorweisen sie der keginwortiglich vnd haben sy beide vorweiset an dy obgenanten guttere vnd alle ire czugehorungen nemlich dy helffte alzo uff Nickeln Schulczen vunff marg, wff Jost Schulczen vier marg vnd uff Anthonius Winckeler virdehalb marg alle jar jerlich in czu enpfaen vnd czu hebin, halb uff Walpurgis vnd halb uff Michaelis in mosen vnd weise, als sy vns dy von der stad wegin czu gebin pflichtig sint vnd wenne sy en solichin czins vff dy vorgenante tage nichtin gebin, so globin wir en mit allen vnsern nochkomen in guten trawen vnd ane arg uff den selben guttern vnd alle ire czugehorunge gnuglicher pfande helffen vnd ap man do selbist nicht pfande gehabin mochte, in dy selbin guttere in czuweisen vnd ap sy sich dennoch doruff nicht irholen mochten vnd en czu korcz wurde, en uff allen andern forgwerken vnd guttern im Dornpossche vndir der stad gelegin gnugliche pfande helffen. Mit solichen gutern adir mit den pfanden sy thuen mogen, als alle recht methe begangen weren, das sy sich sien dor an irholen; worden sy auch czu rothe das sy den czins gancz adir eyns teils wolden vorkouffen, so sullen sy en vns adir vnsern nochkomen vor anbitten, kouffen wir sy en denne nicht bynnen vier wochin, so mogin sy en vorkouffen, weme sy wullen ane geistlichen vnd reisegin lewten; den selbin kewffern globin wir den selbin czins czuvorweisen vnd czuvorschreibin noch dis brieffis lawte. Auch mogin wir vnd alle vnsere nochkomen rathmanne desen czins dreiczendehalbe marg wedir abekouffen wenne wir des czu rate werden vmbe andirhalbhundirt guter vnd genger Vngarissche gulden vnschedelich en an den vorsessen czinsen. Des czu bestetigunge vnd geczewgnis habin wir en desen briff gegebin, dorobir vorsegilt mit vnser stad anhengenden ingesigele, des sontagis vor sandte Johannis tag des tewffers vnsers herren geburt, noch der geburt Cristi vnsers herren fierczenhundirt im funffvndvierczigisten jare.

Orig., als Umschlag des liegn. Schoppenbuches v. J. 1466.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866